आफ्नै पसिनाले बनाएको घर आफैलाइ सत्रु बन्न पुग्ला भन्ने सायदैले सोचेका हुन्छन ।पाेखरामा आफ्नै घरमा भाडामा बस्नेले घरधनी लक्ष्मी गुरुङमाथि कुटपिट भएको छ । पोखराका पुराना हार्डवेयर व्यवसायी विकास कुमार दुगरका छोरा दिग्विजय कुमार दुगर र आशिका दुगरले घरधनी गुरुङलाई हातपात गरेका हुन् । आइतबार साँझ ६:३० बजेतिर घर जाँदा लक्ष्मी गुरुङ र उनकी जेठानी सिता गुरुङमाथि हातपात गरेका हुन् ।
पोखरा सभागृह अगाडि दुगर आइरन नामको हार्डवेयर पसल सञ्चालन गर्दै आएका दूगर परिवार पोखरा १७ ड्यामासाइडमा गुरुङको पक्की साढे दुई तलाको घर झण्डै २६ वर्षदेखि बस्दै आएका छन् ।
पहिलो पटक मिति २०५५ फागुन १८ गते २० वर्षका लागि दुई तला मात्र विभिन्न सर्त सहित गुरुङका श्रीमान यामबहादुर गुरुङले सम्झौता गरेका थिए ।
यस्तै दोश्रो पटक मिति २०७५ माघ १ गते पुन ५ वर्षका लागि अर्थात् २०८० पौष मसान्त सम्ममा लागि पुन सम्झौता गरेका थिए । सम्झौता अनुसार दुगर परिवारले घर खाली गर्न मानेको थिएन । कोरोना कहरका बेला यामबहादुर गुरुङको देहावसान भयो ।
मुख्य सम्झौताकर्ताको मृत्यु भए पश्चात घर छोड्न नमानेको दुगर परिवार वडामा निवेदन गरेपछि आफूले बनाएको संरचनाको रकम दिनुपर्ने बताएका थिए । सम्झौतामा दोश्रो पक्ष अर्थात दुगर परिवारले संरचना निर्माण गर्दा प्रथम पक्ष अर्थात गुरुङसंग अनुमति लिनुपर्ने र छोड्दा लैजान नपाउने उल्लेख गरिएको छ ।
पछिल्लो पटक मिति २०८१ वैशाख ३० गते वडाका मेलमिलाप कर्ताको रोहबरमा मिति २०८१ असार मसान्तमा घर पूर्ण रुपमा खाली गर्ने गरी सहमति भएको थियो । घर धनी गुरुङले आफ्नो घर जान सहज वातावरण नभएको बताइन् ।
आफू कहिले विदेश त कहिले आफन्तकोमा बस्ने तर कहिले काहीँ जाँदा कुकुर छोडी राख्ने , गेट बन्द राख्ने जस्ता क्रियकलापले घर जान सहज नभएको गुरुङले बताइन् ।
आइतबार भएको घटनामा दिग्विजय दुगर र आशिका दुगरले गुरुङमाथि हातपात गरी गुरुङको जेठानी सिता गुरुङको मोबाइल तोडफोड गरेका छन् । हातपात गर्दा १ तोलाको सुनको सिक्री पनि हराएको सिता गुरुङले बताइन् । वडा प्रहरी कार्यालय बैदाममा उजुरी गरे पछि दुवैजनालाई प्रहरीले सोमबार पक्राउ गरी हिरासतमा राखेको छ । मंगलबार अभद्र व्यबहार मुद्दामा म्याद थप गर्नेगरी प्रक्रिया अगाडि बढाइएको बैदाम प्रहरी इन्चार्ज डिएसपी राजेन्द्र श्रेस्ठले बताए । रातभरमा कुनै सहमती र मेलमिलाप भएन भने मङलाबार म्याद थप गरि अभद्र व्यवहार मुद्दा चलाइने निश्चिति देखिन्छ ।
